Ushtria izraelite: Sulmet e shtuara të Hezbollahut mund të sjellin përshkallëzim

Ushtria izraelite njoftoi sot se sulmet e intensifikuara ndërkufitare nga lëvizja militante libaneze Hezbollah ndaj Izraelit mund të shkaktojnë një përshkallëzim serioz.

“Agresioni në rritje i Hezbollahut na sjell në prag të asaj që mund të jetë një përshkallëzim i konfliktit, i cili mund të ketë pasoja shkatërruese për Libanin dhe të gjithë rajonin”, tha zëdhënësi ushtarak izraelit, kundëradmirali Daniel Hagari, raportoi Reuters.

Hagari theksoi se Izraeli do të marrë masat e nevojshme për të mbrojtur civilët e tij derisa të rivendoset siguria përgjatë kufirit me Libanin. Hezbollahu, i mbështetur nga Irani, javën e kaluar nisi sulmet më të mëdha me raketa dhe dron në veri të Izraelit që nga fillimi i sulmeve ndërkufitare nga të dy palët në tetor, kur filloi lufta në Gaza.

SHBA dhe Franca janë të përkushtuara për fillimin e negociatave për t’i dhënë fund armiqësive përgjatë kufirit izraelito-libanez. Hezbollahu ka njoftuar se nuk do të ndalojë sulmet e tij ndaj Izraelit derisa ushtria izraelite të ndalojë ofensivën e saj në Rripin e Gazës.

LEXONI GJITHASHTU:

• Ndërprerje taktike e luftimeve, Izraeli njofton vendimin për lejimin e ndihmave
• Xhihadi Islamik nuk do t’i lirojë pengjet derisa Izraeli të tërhiqet nga Gaza