Vaksinimi masiv, të moshuarit mbi 75 vjeç marrin dozën e parë të “Sinovac”

Sheshi “Skënderbej” ishte i mbushur mëngjesin e kësaj të diele me të moshuar që të vendosur në radhë, prisnin të bënin vaksinën anti-covid “Sinovac”.

Për pjesën më të madhe të tyre, fillimi i vaksinimit masiv është një lajm i shumëpritur dhe nuk kanë hezituar për ta marrë dozën e parë, edhe pse shume prej tyre shprehen se e kanë kaluar një herë virusin.

Sakaq, Mirela Cami, drejtoreshë e Operatorit të Kujdesit Shëndetësor gjatë një prononcimi për mediet shpjegoi se si do të kryhet procesi i vaksinimit masiv, duke nisur që nga njoftimi nga mjeku i familjes e deri të marrja e dozës.

“Në qendrat shëndetësore po vaksinohen grup-moshat plus 80. Të gjithë mjekët e familjes janë në komunikim me të moshuarit dhe të moshuarit kanë kontaktuar mjekun e familjes dhe nëse janë në këtë grup-moshë njoftohen në fasha orare, për të ardhur në sheshin Skënderbeu. Ka një orë të caktuar, mjekët e familjes i kanë njoftuar të gjithë pacientët për fashën orare. Vaksinimi do të vijojë deri në orën 17:00.  E njëjta gjë do të funksionojë edhe në rrethe”, Mirela Cami, drejtuese e Operatorit të Kujdesit Shëndetësor

Vaksinimi masiv i moshave mbi 75 vjeç do të do të vijojë sipas planit kombëtar, në të gjithë vendin në qendrat e vaksinimit në çdo qytet dhe për moshat mbi 85 vjeç në qendrat shëndetësore të çdo njësie.

Aktualisht në Shqipëri janë vaksinuar 64,075 dhe në përdorim janë 4 lloje vaksinash, “Pfizer”, “Astra Zeneca”, “Sputnik” dhe “Sinovac”.