Vala e të nxehtit në Greqi, Qipro dhe Turqi merr jetë njerëzish

Pjesë të Evropës Jugore janë goditur nga temperatura të larta rekord ditët e fundit për shkak të depërtimit të ajrit të ngrohtë nga Afrika e Veriut. Vala e të nxehtit që përfshiu jugun e Kontinentit të Vjetër mori disa jetë njerëzish, gjë që çoi në mbylljen e shkollave dhe atraksioneve turistike.

Meteorologët thonë se mund të jetë një paralajmërim i kushteve ekstreme të motit, të cilat ende na presin këtë verë.

Vala e parë e të nxehtit në Greqi gjatë javëve të fundit ka marrë jetën e të paktën pesë turistëve, duke përfshirë prezantuesin dhe mjekun televiziv britanik Michael Moseley.

Një turist amerikan i zhdukur disa ditë më parë u gjet i vdekur të dielën në plazhin e një ishulli të vogël në veri të Korfuzit, raportojnë mediat lokale. Gjithashtu, eshtrat e një turisti holandez u gjetën të shtunën në Samos.

Një numër i madh turistësh kanë pasur nevojë për ndihmë mjekësore, pasi merkuri në termometër ka kaluar të dyzetat në pjesën më të madhe të vendit. Meqë ra fjala, temperatura në Kretë arriti në 44.5 gradë Celsius, ndërsa në Peloponez u mat 43.9 gradë, njofton Observatori Kombëtar nga Athina.

Vala më e gjatë e të nxehtit në Greqi është regjistruar korrikun e kaluar, kur temperaturat e tilla zgjatën plot 16 ditë, por disa ekspertë besojnë se periudha të tilla temperaturash jashtëzakonisht të larta po ndodhin edhe më herët.

Një javë jashtëzakonisht e nxehtë u regjistrua edhe në Qipro, ndërsa të dielën zyrtarët shëndetësorë njoftuan se gjithsej dy të moshuar kishin vdekur nga vala e të nxehtit.

Të paktën tre pacientë të moshuar janë në gjendje të rëndë, ndërsa spitalet po përballen me një numër të madh të rasteve të rraskapitjes për shkak të temperaturave të larta, raportojnë mediat lokale.

Shteti dha alarmin e parë të kuq të motit të sezonit të premten, pasi në disa zona u regjistrua 45 gradë Celsius, dhjetë gradë mbi mesataren për këtë periudhë të vitit dhe dita më e nxehtë e korrikut e të gjitha kohërave ishte regjistruar tashmë. Inspektimi i Ministrisë së Punës kërkoi pezullimin e punimeve të rënda dhe të mesme të rënda në natyrë.

Temperatura në Turqi javën e kaluar ishte tetë deri në 12 gradë mbi mesataren për këtë periudhë të vitit. Në disa qytete u matën 40 gradë dhe në Stamboll u dha një paralajmërim për kufizimin e kohës së kaluar në diell për grupet e ndjeshme si të moshuarit dhe të sëmurët, gratë shtatzëna dhe fëmijët. Lagështia e lartë gjithashtu e bën të vështirë ftohjen në këtë vend.

Zjarret kanë përfshirë edhe Turqinë dhe zjarrfikësit po përpiqen t’i mbajnë nën kontroll duke përdorur aeroplanë, helikopterë dhe makineri të tjera.

Të premten, flakët përfshiu shtatë provinca në të gjithë Turqinë, por shumica u vunë nën kontroll deri në fund të ditës.

LEXONI GJITHASHTU:

• I nxehtë ekstrem në Athinë, temperatura e asfaltit arrin rekordin 96.2 gradë celsius
• Durrësi qyteti më i nxehtë i Ballkanit deri në vitin 2040, ja arsyet…