Vdekja e 32-vjeçarit, avokati Lapaj: Kundërthëniet e policisë

Avokati Adriatik Lapaj thotë se në deklaratën e policisë në lidhje me vdekjen e 32-vjeçarit Laer Kurti, sheh disa kundërthënie.

Në emisionin “Now” në Euronews Albania, Lapaj nënvizoi se nëse i riu do posedonte drogë, ai do kishte ikur dhe nuk do priste që policia t’i kërkonte kartën e identitetit.

Sipas tij, është e pamundur që Kurti të ketë gëlltitur një qese me lëndë narkotike teksa vraponte për t’i ikur policisë.

“Në lidhje me ngjarjen, unë nga deklarata e policisë, gjej disa kundërthënie dhe janë shumë të dukshme. Aty thuhet që patrulla e policisë e ka parë para një qepene, ka ndaluar, në momentin e parë djali nuk ka ikur. Në momentin e dytë, ata i kanë kërkuar kartën e identitetit, në këtë moment, thuhet se ai ikën me vrap dhe këta e ndjekin për 200 metra.

Nëse ai do kishte drogë me vete, nuk kishte pse priste t’i kërkonin kartën e identiteti, por do ikte që në fillim. Kur një njeri vrapon, teknikisht, mund ta hedhë dhe është e pamundur që ta gëlltitësh poshtë. Në këtë pikë, unë them se ka probleme me mënyrën sesi është raportuar ngjarja”, theksoi ai.

Përmes një njoftimi, Agjencia e Mbikëqyrjes Policore tha se mbrëmjen e 19 tetorit, gjatë patrullimit në Rr. “Riza Çuka” në zonën e Laprakës, efektivët kanë konstatuar Laert Kurtin duke qëndruar përpara një biznesi privat, për të cilin kushtet dhe rrethanat diktonin nevojën e një verifikimi.

I riu u shoqërua në komisariat dhe hetimi paraprak del në përfundimin se ai humbi jetën për shkak se ka gëlltitur një qese me drogë, për t’iu shmangur kapjes nga policia.

LEXONI GJITHASHTU

• “Policia të dorëzohet e gjitha”, Manjani shigjeton Ardi Veliun: Pse nuk arrestohet?
• Vdekja e mistershme e të riut, Andi Bushati: Krim policor që po fshihet?
• 3 viktima, ngjarjet e bujshme ku u përfshinë efektivë të Policisë së Shtetit