Vdekja e kamarierit në Sarandë, ISHMT: S’kemi kryer kontrolle, se s’kishte ashensor

Inspektorati Shtetëror i Mbikëqyrjes së Tregut ka reaguar në lidhje me vdekjen e kamarierit 17-vjeçar Antonio Delilaj, në një diskotekë të njohur në qytetin e Sarandës.

Përmes një njoftimi zyrtar, ISHMT shkruan se pajisja e përshtatur nga lokali për transportin e mallrave në magazinë nuk është ashensor.

ISHMT thekson se duke qenë se nuk kemi të bëjmë me një ashensor por me një pajisje të përshtatur, në këtë subjekt nuk janë kryer verifikime nga ana e këtij institucioni.

“Në lidhje me aksidentin e ndodhur mbrëmjen e djeshme datë 26.08.2023 në subjektin “Orange”, Sarandë, ku një i ri 17-vjeçar humbi jetën, Inspektorati Shtetëror i Mbikqyrjes së Tregut pasi ka kryer verifikimet në terren, informon se:

Pajisja e përshtatur për transport mallrash nga subjekti, e cila ka pësuar defekt nuk është ashensor.

Si rrjedhojë, ISHMT nuk ka kryer inspektime apo kontrolle pranë këtij subjekti, bazuar kjo në detyrimin e përputhshmërisë së instalimit të vendosur në shërbim nga personi përgjegjës, pasi nuk është brenda kompetencës ligjore të tij.

ISHMT shpreh keqardhje për aksidentin tragjik dhe i shpreh ngushëllime të sinqerta familjes së të riut”, njofton ISHMT.

Kujtojmë se 17-vjeçari që punonte si ndihmës kamrier u godit nga kavoja e ashensorit dhe ndërroi jetë në vend. Në lidhje me ngjarjen u shpall në kërkim pronari i lokalit Spiro Iljadhi, dhe u arrestua Lulzim Allkushi, personi i pa certifikuar që kishte sajuar ashensorin.