Vdiq pas operacionit plastik, zbardhen detajet: 28-vjeçarja vuante nga kanceri

Një ndërhyrje kirurgjikale ka qenë fatale për një 28-vjeçare në Tiranë. Lirida Hasalla iu nënshtrua një operacioni në një prej spitaleve private të kryeqytetit, por fatkeqësisht humbi jetën.

Prej dy vitesh e reja po përballej me një sëmundje të pashërueshme nga kanceri në mitër.

Ajo kurohej jashtë vendit, por ditët e fundit ishte kthyer në Shqipëri dhe pas konsultave që kishte bërë me mjekët në spitalin privat kishte vendosur të kryente një operacion për të hequr disa kilogramë.

Ndërhyrja krirurgjikale u krye këtë të hënë dhe kushtoi 4 mijë euro. Një ditë më pas pacientja ka kërkuar të shkoj në tualet dhe sipas familjarëve infermierja nuk e ka ndihmuar dhe e ka lejuar të ngrihet.

Në momentin që ka lëvizur nga shtrati, 28-vjeçarja ka rën në tokë dhe ka pësuar trombozë.

Hasalla ka qëndruar për disa orë në reanimacion, por fatkeqësisht humbi jetën.

Familjarët akuzojnë stafin mjekësor për vdekjen e 28-vjeçares pasi sipas tyre mjekët nuk duhet ta kishin lejuar të kryente një ndërhyrje të tillë për shkak të sëmundjes që kishte si dhe për mungesë të trajtimit mjekësor.

Për këtë ngjarje tragjike janë marrë në pyetje familjarët e të resë, mjekët dhe anestezisti që kanë marrë pjesë në operacion.

Ndërkohë pritet përgjigjja e autopsisë për të përcaktuar shkakun e vdekjes së 28-vjeçares.

LEXONI GJITHASHTU:

• Humbi jetën pas operacionit estetik, spitali privat reagon për vdekjen e 28-vjeçares
• Operacioni “Tempulli”, mbeten në burg 35 shpërndarësit e drogës në Durrës