Në përfundim të një seance maratonë gjyqësore në gjykatën e Durrësit, që nisi në orën 10 të paradites së të enjtes dhe përfundoi rreth orës 19:00, janë caktuar masat e sigurisë për 43 të arrestuarit për goditjen e shpërndarësve të lëndëve narkotike në qytetin bregdetar.

Gjyqtarja Besjana Garxenaj ka vendosur masën e sigurisë personale “Arrest në burg” për 35 prej të arrestuarve, “Arrest në shtëpi” për njërin prej tyre dhe 7 të tjerë, mes të cilëve dhe një grua, u lanë të lirë me masat shtrënguese “Detyrim paraqitjeje” dhe “Ndalim i daljes jashtë shtetit”.

Të akuzuarit u arrestuan pas finalizimit të operacionit kombëtar ‘Tempulli 2’. Në kuadër të këtij operacioni, policia e Durrësit ushtroi 65 kontrolle, prej të cilave u sekuestruan 1 kg e 120 gramë  kokainë dhe 250 doza, 8 kg kanabis sativa dhe miliona lekë, mijëra euro dhe 6 armë zjarri.

Për goditjen e këtij grupi masiv të shpërndarjes të drogave të ndryshme, përfshirë kokainë, heroinë dhe kanabis sativa në territorin e Durrësit janë përdorur metoda speciale të hetimit, kryesisht metoda e blerjes së stimuluar.

LEXONI GJITHASHTU:

• VIDEO| “Tempulli” në Durrës: 52 të arrestuar, sekuestrohen armë dhe drogë
• “Tempulli”, mes 23 të arrestuarve dhe këshilltari bashkiak në Elbasan (EMRI)