Veliaj letër monitoruesve të KiE: Pres tju takoj në paraburgim

Kryetari i Bashkisë së Tiranës, Erion Veliaj, i ka dërguar një letër misionit monitorues të Kongresit të Autoriteteve Lokale dhe Rajonale të Këshillit të Europës, që do të zhvillojë vizitën e tij në Shqipëri nga 17 deri më 19 nëntor.

Gjatë qëndrimit në vend, përfaqësuesit e Kongresit do të zhvillojnë një takim në ambientet e IEVP Durrës, ku Veliaj mbahet në paraburgim që prej 10 shkurtit, si pjesë e hetimeve për korrupsion dhe pastrim parash.

Në kërkesën e tij drejtuar SPAK, Drejtorisë së Përgjithshme të Burgjeve dhe Gjykatës së Posaçme Kundër Korrupsionit dhe Krimit të Organizuar, Veliaj kërkon që të sigurohen kushtet për zhvillimin e takimit, duke theksuar se qëllimi është transparenca, komunikimi i drejtpërdrejtë dhe informimi mbi situatën e tij ligjore dhe statusin institucional si kryebashkiak. Ai referohet gjithashtu në Konventën Europiane për të Drejtat e Njeriut, veçanërisht nenet 6 dhe 8, që garantojnë të drejtën për komunikim dhe përfaqësim.

Veliaj u arrestua më 10 shkurt dhe më 23 shtator, Këshilli Bashkiak vendosi shkarkimin e tij për mungesë në punë, vendim i konfirmuar më pas nga Këshilli i Ministrave më 25 shtator. Kryebashkiaku e kontestoi vendimin në Gjykatën Kushtetuese, e cila më 3 nëntor vendosi në favor të tij, duke shpallur të paligjshëm shkarkimin dhe duke e rikthyer në detyrë. Sipas gjykatës, mungesa e tij në punë ishte e lidhur me arrestimin, dhe jo me shkelje të rëndë ose abuzim.

LEXONI GJITHASHTU:

• Gjykata e Lartë rrëzon rekursin e vëllait të Veliajt për kontrollet në banesë
• Veliaj i kërkon leje SPAK dhe Burgjeve të zhvillojë takimin me monitoruesit e KE