Veliaj mbetet në qeli, Manjani: Vendimet e gjykatave si lejet e ndërtimit, zbardhen pas disa viteve

Juristi Ylli Manjani komentoi në emisionin Now në Euronews Albania vendimin e Gjykatës së Lartë që hodhi poshtë rekursin e kryebashkiakut të Tiranës Erion Veliaj duke lënë në fuqi masën e sigurisë arrest me burg ndaj tij.

Sipas tij vendimi i Gjykatës së Lartë është marrë mbi një vendim të Kushtetueses që ende nuk është zbardhur dhe nuk është botuar në Fletoren Zyrtare.

“Vendimi i Gjykatës Kushtetuese, nuk është zbardhur ende, vendimet e gjykatave janë bërë si lejet e ndërtimit që mezi zbardhen. Duhet zbardhur, të botohet në Fletoren Zyrtare dhe të bëhet i detyrueshëm nga Gjykata e Lartë, pra Gjykata e Lartë duhet ta shqyrtojë sërish, pasi vendimi i Kushtetueses i argumentuar të botohet në Fletoren Zyrtare.

De fakto, nuk ekziston një vendim i Kushtetueses; ka gjykuar pa vendimin e Kushtetueses. Ajo që duhet diskutuar është: a ka zbardhur Gjykata e Lartë vendimin e vet? Edhe ai vendim nuk është zbardhur ende, ndaj thashë që vendimet e gjykatave janë bërë si lejet e ndërtimit, që iu duhen nja dy vjet të zbardhen.

Asnjë vendim nuk është ende i detyrueshëm për zbatim në praktikën konkrete”, tha Manjani.