Veliaj takon Zelenskin: Do rindërtojmë shkolla në Ukrainë, mbështetje për rimëkëmbje

Bashkia e Tiranës do të ndihmojë Ukrainën me rindërtimin e shkollave dhe do të japë ekspertizën e saj për rimëkëmbjen e Ukrainës si pasojë e luftës.

Kreu i Bashkisë së Tiranës, Erion Veliaj pas takimit me presidentin Zelenski në Kive shprehet se ky i fundit i shprehu mirënjohjen e tij për mbështetjen që Shqipëria dhe kryeministri Rama kanë dhënë gjatë gjithë kësaj periudhe.

“Shumë i lumtur që u takova me Presidentin Zelensky në Kiev, i cili shprehu mirënjohjen e tij për mbështetjen e Shqipërisë dhe Kryeministrit Rama në Këshillin e Sigurimit, strehimin e refugjatëve dhe çdo ndihmë tjetër. Tirana dhe Kharkivi janë qytete motra ne jemi zotuar të rindërtojmë shkolla aty dhe të japim ekspertizën tonë në rimëkëmbjen e Ukrainës”, thekson Veliaj në një postim në Twitter.

Kryetari i Bashkisë së Tiranës Erion Veliaj ishte pjesë e grupit të Kryetarëve të Bashkive të Qyteteve Evropiane të Eurocities në mbështetje të Ukrainës.

Në prani të Presidentit Zelensky, Shefi i Zyrës së Presidentit, Andriy Yermak dhe Presidenti i Eurocities Dario Nardella, nënshkruan një Memorandum Mirëkuptimi për të mbështetur rindërtimin e qëndrueshëm të qyteteve të Ukrainës.

Kujtojmë që Shqipëria, Mali i Zi dhe Maqedonia e Veriut do të rindërtojnë një bllok banesash në Irpin, një ndër qytetet më të shkatërruara në Ukrainë si pasojë e sulmeve nga Rusia.

LEXONI GJITHASHTU:

• Putin jep dritën e gjelbër për misionin e OKB-së në impiantin e Zaporizhias
• Putin dhe XI në G20, samiti i parë global që kur Rusia pushtoi Ukrainën