Vendet skandinave në alarm, anija e spiunazhit, Suedia: Rusia kërcënim akut

Qeveritë e Suedisë dhe Norvegjisë janë në alarm nga misioni rus i spiunazhit në detin e Veriut.

Një dokumentar i transmetuar nga televizionet e vendeve nordike akuzon Rusinë se po mbledh të dhëna dhe po përgatit akte sabotazhi në rajon.

Teksa pret të anëtarësohet në NATO, Suedia është në gatishmëri.

“Kjo konfirmon atë që kemi ditur prej kohësh, se Rusia nuk është vetëm një kërcënim akut për sigurinë dhe lirinë e Ukrainës, por edhe një kërcënim për vendet në rajonin tonë, përfshirë Suedinë. Sikurse e thash, kjo nuk është një risi, por është një arsye përse kemi vënë në lëvizje trupat tona. Në një çast mund të na duhet të reagojmë, por nuk do të flas për këtë në këto momente”, tha Ulf Kristersson, kryeministër i Suedisë.

Nga ana e saj, Rusia mohon akuzat. Zëdhënësi i presidentit Putin u bën thirrje vendeve nordike për më shumë vëmendje ndaj sabotimit të gazsjellësit “Rrjedha e Veriut”.

“Organet mediatike të këtyre vendeve gabojnë me investigimet e tyre dhe sërish preferojnë të akuzojnë Rusinë pa asnjë motiv. Do të bënin më mirë t’i kushtonin vëmendje sulmit terrorist ndaj gazsjellësve “Rrjedha e Veriut” dhe nevojës për një hetim urgjent ndërkombëtar ndaj këtyre akteve terroriste të paprecedenta”, shprehet Dmitry Peskov, zëdhënës i Kremlinit.

Shtatorin e kaluar, disa shpërthime dëmtuan gazsjellësin “Rrjedha e Veriut” që transportonte gaz rus në Evropë. Përgjegjësit për këtë akt sabotimi nuk janë identifikuar ende.

Rusia u la jashtë hetimeve nga vendet nordike dhe tani gjasat janë që të izolohet më shumë për shkak të dyshimeve për spiunazh.

LEXONI GJITHASHTU:

• Rusia paralajmëron Korenë e Jugut kundër armatosjes së Ukrainës
• Rusia refuzon lirimin e reporterit të ‘Wall Street Journal’