Vendimi i Kosovës për heqjen e dinarit, Franca: Të pezullohet masa, ndikon te serbët

Franca ka kërkuar pezullimin e menjëhershëm të vendimit të Bankës Qendrore të Kosovës për ndalimin e përdorimit të dinarit serb.

Përmes një njoftimi të Ministrisë së Punëve të Jashtme, Franca thotë se është e shqetësuar për vendimin e Bankës Qëndrore në Kosovë, që lejon vetëm euron për përdorim cash.

Po ashtu thuhet se ky vendim është i marrë me nxitim e në mënyrë të pakoordinuar dhe do të ketë pasoja në jetën e përditshme të komunitetit serb në Kosovë, i cili në masë të madhe është i varur nga pagesat në dinarë serbë.

Reagimi i Ministrisë së Jashtme të Francës:

Franca është e shqetësuar nga urdhri i lëshuar nga Banka Qendrore e Republikës së Kosovës që kufizon të gjitha transaksionet me para të gatshme në vend veç euros, duke filluar nga 1 shkurti 2024.

Ky urdhër, i cili u vendos në mënyrë të nxituar, do të ndikojë në jetën e përditshme të komunitetit serb në Kosovë, i cili varet shumë nga pagesat nga Serbia në dinarë serbë.

Duke pasur parasysh mungesën e zgjidhjeve alternative në këtë kohë, Franca kërkon pezullimin e menjëhershëm të kësaj mase për të mundësuar një periudhë të mjaftueshme tranzicioni. U bëjmë thirrje autoriteteve kosovare që të gjejnë një zgjidhje përmes negociatave në kuadër të dialogut të lehtësuar nga BE-ja.

LEXONI GJITHASHTU:

• Vuçiç: Heqja e dinarit në Kosovë, sulm ndaj të gjitha marrëveshjeve të nënshkruara
• KE-ja shton presionin ndaj Kosovës për shkak të vendimit për heqjen e dinarit