“Vendimi në fuqi edhe sot…”, Murrizi: Ja ana ligjore e “skemës së ujësjellësit”

Avokati Fabjon Murizi ndërsa foli për skandalin në ujësjellësin e Vlorës, ku 98 punonjës kanë ngritur padi ndaj shoqërisë, tha se nuk mund të quhet skemë mashtrimi, fakti se punonjësit kanë disa pretendime.

Ai tha për “Review” në Euronews Albania se në fakt problemi, qëndron te vendimet e dhëna nga Gjykata.

“Nuk mund të konsiderohen skemë pretendimet që në vetvete njerëzit mund t’i konsiderojnë të ligjshme. Problemi qëndron te gjykata. Mendoj se problemi është te vendimet e dhëna. Paditësit mund të kenë çdo lloj pretendimi.

Unë pata rastin të shikoja disa nga vendimet. Mendoj se fillimisht duhet të shikojmë a janë të drejta pretendimet e punonjësve. Unë mendoj se disa janë të drejta, madje i kanë pranuar edhe vetë shoqëritë pasi tashmë i kanë shkruar në kontratat kolektive që kanë aplikuar nga janari. Këta vjetërsinë e punës e kanë të parashikuar në kontratë kolektive, kështu që duhet ta merrnin. Sa i përket shtesës për ushqimin, vërtet KLSH u ka rekomanduar të mos e japin më , por këta kanë pasur një vendim që duhet t’ia jepnin dhe nuk e kanë ndryshuar as sot e kësaj dite, sa kohë ky vendim nuk është hequr atyre u takon.

Për mua tjetër problem është afati i parashikimit të kredisë. Kodi i punës parashikon një afat 3-vjeçar, që do të thotë se këto pretendime mund të ishin, por duhet të shtriheshin maksimalisht 3 vite më para”,-tha avokati.