Verifikim faktesh: A është Suedia aq e pasigurt sa thotë Trump?

Presidenti amerikan Donald Trump ka lëshuar një seri kritikash ndaj vendeve evropiane, duke vënë theksin te politikat e imigracionit dhe siguria.

Në një intervistë me Politico më 9 dhjetor, Trump sulmoi qytetet e Parisit dhe Londrës, si dhe Gjermaninë dhe Suedinë, duke i përshkruar këto vende si “të dobëta” dhe në “prishje” për shkak të fokusit mbi korrektësinë politike.

“Shikoni Suedinë, dikur vendi më i sigurt në Evropë, tani është mjaft i pasigurt,” tha Trump.

“Është e vështirë të besohet se kjo është e vërtetë; është një vend krejtësisht tjetër.”

Ai shtoi se “miliona njerëz vërshojnë në këto vende” dhe shumë prej tyre kryejnë krime të jashtëzakonshme.

Si duket realiteti?

Euronews, përmes ekipit The Cube, analizoi disa të dhëna për sigurinë. Indeksi Global i Paqes vendos Suedinë në vendin e 35-të nga 163 vende, duke marrë 1.709 pikë — ku sa më afër 1, aq më e sigurt është një vend.

Në krahasim, SHBA-ja renditet në vendin e 128-të me 2.443 pikë. Tetë nga 10 vendet më të sigurta në botë janë evropiane, me Islandën dhe Irlandën në krye.

Shkalla e vrasjeve në Suedi për 100,000 banorë ishte 1.15 në vitin 2023, nga 0.9 në vitin 2014, duke treguar një rritje të lehtë të dhunës.

Shumica e incidenteve lidhen me bandat kriminale dhe konfliktet për territor dhe tregtinë e drogës, ku shpesh përfshihen të rinj. Autoritetet suedeze gjithashtu po monitorojnë rolin e mediave sociale në përhapjen e dhunës.

Në krahasim, disa shtete të SHBA-së kanë norma më të larta: New Hampshire ka 1.9 vrasje për 100,000 banorë, ndërsa Distrikti i Kolumbias ka 33.1. Në Evropë, normat më të ulëta u regjistruan në Lihtenshtajn (0.0), Maltë (0.37) dhe Itali (0.57).

Përfundimi

Megjithëse Suedia ka parë një rritje të dhunës së bandave, ajo mbetet më e sigurt se shumica e vendeve të SHBA-së dhe një pjesë e madhe e Evropës.

Statistikat tregojnë një situatë komplekse që sfidon pretendimet e Trump-it për “pasiguri totale” në vendet skandinave.