Verifikimi i mandatit të deputetëve, Kuvendi kërkese KQZ-së për dokumentacionin

Kuvendi i ka drejtuar një kërkesë Komisionit Qendror të Zgjedhjeve për t’i vënë në dispozicion dokumentacionin për verifikimin e mandatit të deputetëve.

Më 12 shtator pritet të mblidhet kuvendi i dalë nga zgjedhjet e 11 majit.

Të premten, parlamenti do të zhvillojë dy seanca. Njëra prej tyre do të jetë paradite ku do të ngrihet komisioni i përkohshëm i verifikimit të mandateve dhe më pas sërish në të njëjtën ditë pasdite do të rikthehen për të bërë betimin 140 deputetët si edhe do të zgjidhet kryetari i kuvendit.

Ky i fundit zgjidhet me propozimin e të paktën 15 deputetëve, me votim të fshehtë dhe pa debat me shumicën e votave.

Seancën e parë do e drejtoj socialisti Vasil LLajo si deputeti më i vjetër në moshë, kjo pasi as Sali Berisha dhe as Tritan Shehu nuk kanë pranuar që të drejtojnë këtë seancë.

Rezultatet e 11 majit prodhuan 83 mandate për partinë socialiste, 50 mandate për partinë demokratike, 3 mandate partia socialdemokrate, 2 mandate partia mundësia, 1 mandat Shqipëria bëhet dhe 1 mandat lëvizja bashkë.

Nga 140 deputetë që ka Kuvendi i Shqipërisë, 72 janë deputetë për herë të parë në karrigen e parlamentit.

LEXONI GJITHASHTU:

• Në mungesë kuorumi dështon mbledhja e Kryesisë së Kuvendit
• E ngarkuara me punë e SHBA në Tiranë zbarkon në Kuvend, takim me Spiropalin