Baza ushtarake e NATO-s në Kuçovë u inagurua këtë të hënë me një ceremoni ku morën pjesë krerët më të lartë të shtetit, por dhe zyrtarë të NATO-s dhe diplomatë.
Në përfundim të fjalimeve u dhurua një spektakël në ajër nga avionët e NATO-së, të cilët fluturuan mbi kokat e të pranishmëve dhe u ulën në bazën e sapohapur në Kuçovë.
Ishin 6 avionë EuroFighter F-2000 të cilët u ngritën në qiellin e Kuçovës.
Me infrastrukturë moderne, baze e Kuçovës do të shërbejë si një bazë ajrore për avionët luftarakë të NATO, ndërkohë që disa ditë më parë u vendosën dhe 3 dronë Bayraktar që Shqipëria bleu nga Turqia.
Punimet për rikonstruksionin e saj nisën në janar të vitit 2022. Prej asaj kohe është punuar për sistemin e rrethimit dhe të sigurisë e po ashtu të mbrojtjes në perimetrin ku shtrihet kjo bazë.
Nga NATO janë të investuara afërsisht 50 milionë euro dhe më shumë se 5 milionë euro janë investuar nga qeveria shqiptare. Autoritetet shqiptare kanë marrë përsipër ndërtimin e perimetrit të sigurisë dhe rrugëve lidhëse, ndriçimit, vendosjen e kamerave të sigurisë së bazës si dhe të sensorëve të zbulimit të ndërhyrjeve përgjatë rrethimit të bazës.
Për autoritetet shqiptare përzgjedhja e bazës së Kuçovës lidhet sa me pozicionin gjeo-strategjik të vendit, si dhe të vet aeroportit, aq dhe me besueshmërinë që Shqipëria ka krijuar në gjirin e aleancës ushtarake.
Baza ajrore e Kuçovës është ndërtuar në vitet 1950, por doli jashtë përdorimit në vitet ’90.
