VIDEO| Bombardohet ura e Krimesë, Moska akuzon Kievin

Teksa kundërofensiva e Ukrainës vijon, Moska ka akuzuar të enjten Kievin se ka bombarduar urën në Krimenë e pushtuar me një raketë të prodhimit britanik. Nga shpërthimi nuk ka pasur viktima, por struktura është dëmtuar rëndë. Ukraina nuk e ka konfirmuar përgjegjësinë.

Gjithçka erdhi teksa Kievi pranoi se progresi i tij në dëbimin e trupave ruse nga Donjecku dhe Zaporizhia po vazhdon me ngadalë. Trupat vendase kanë rimarrë nën kontroll fshatra të shumtë, por çdo fitore është shoqëruar me humbje të mëdha.

Nisur nga kjo, kancelari gjerman u ka bërë thirrje fuqive perëndimore të rrisin ndihmën ushtarake për Ukrainën në samitin e ardhshëm në Vilnius.

“Paralelisht, ne po punojmë me partnerët tanë të grupimit G7, BE-së dhe Ukrainës për një angazhim efikas dhe afatgjatë në fushën e sigurisë. Qëllimi ynë është i dyfishtë: t’i ofrojmë Ukrainës mbështetje ushtarake dhe në të njëjtën kohë të përforcojmë fuqinë e saj ekonomike në mbrojtjen nga agresioni rus”,- tha Olaf Scholz, kancelar i Gjermanisë

Por edhe Rusia po përjeton humbje të mëdha dhe presidenti Putin ndodhet nën presion për të reaguar. Kreu i grupit të mercenarëve “Wagner” i ka bërë thirrje kreut të Kremlinit që të zgjerojë mobilizimin ushtarak, gjë që ai ka ngurruar ta bëjë deri më tani.

Krahas kësaj, Moska ka hedhur poshtë deklaratat e presidentit ukrainas Zelensky se Rusia po planifikon një sulm ndaj impiantit bërthamor të Zaporizhias.

LEXONI GJITHASHTU:

• 120 mln euro borxhe, qeveria dhe bashkitë rrisin detyrimet, shumica për investime
• Luiza Gega hyn në histori, shpallet kampione evropiane në garën për 3 mijë metra