VIDEO| Policia rrugore apel shoferëve: Po monitoroheni, mos e kryeni këtë shkelje

Policia e Tiranës ka ndarë një mesazh për të gjithë drejtuesit e mjeteve në kryeqytet. Në komunikatën zyrtare apelohet që drejtuesit e mjeteve të mos bëjnë kalim të menjëhershëm nga një korsi në tjetrën, pa u pozicionuar në fillim, kryesisht në daljet nga autostrada.

Sipas policisë kjo manovër e rrezikshme bëhet burim aksidentesh dhe ndaj do të ndahen në rrjete sociale pamjet dhe vendosja e gjobave për këto lloj shkeljesh.

NJOFTIMI I POLICISË:

Vëmendje të gjithë drejtuesit e mjeteve!

Së fundmi, kemi konstatuar disa shkelje  të kodit rrugor, veçanërisht drejtuesit e mjeteve që kryejnë kalim të menjëhershëm nga një korsi në tjetrën, pa u pozicionuar në fillim, në kundërshtim me Nenin 174.2.b.

Kjo manovër e rrezikshme jo vetëm që shkel rregullat por vendos në rrezik të gjithë përdoruesit e rrugës.

Për të ndërgjegjësuar dhe parandaluar këto sjellje në të ardhmen, do të ndajmë pamje filmike të këtyre shkeljeve në rrjetet tona sociale.  

Ju lutemi, qëndroni të vëmendshëm dhe respektoni rregullat e trafikut për një udhëtim më të sigurtë për të gjithë.