Edhe në ditën e dytë të përcaktuar në Komisionin Hetimor për të dëshmuar për koncesionet në shëndetësi, Ilir Beqaj u paraqit me pranga në duar.
Këtë herë ish-ministri i Shëndetësisë kishte hequr dorë nga power pointi për të demonstuar pamje gjatë dëshmisë së tij, por kishte printuar disa foto.
Por kjo zgjedhje e Beqajt prodhoi sërish debate dhe përplasje të forta mes deputetëve të PD e PS, me opozitën që e cilësoi këtë sjellje të ish-ministrit si shkelje të rregullave të Kuvendit.
E në kundërpërgjigje të fotove të printuara nga Beqaj, deputetët e opozitës shpalosën në Komision disa foto të kryeministrit Rama me biznesmenen Vilma Nushi.
Me Ilir Beqajn që priste në korridoret e Kuvendit, për më shumë se 4 orë mbledhje të komisionit hetimor, deputetët e të dyja palëve i konsumuan duke u përplasur dhe debatuar mes veti.
Më herët, para se të mblidhej Komisioni, PD kërkoi sërish që të shtyhej veprimtaria e tij, por që nuk u pranua nga deputetët e PS. Kjo e mërkurë përkon të jetë afati final i veprimtarisë së këtij komisioni që tashmë do duhet të hartojë raportin që i dërgohen për votim seancës plenare.
LEXONI GJITHASHTU:
- Ilir Beqaj shkon në Kuvend me pranga në duar, pritet të dëshmojë për Sterilizimin
- SPAK kontroll në banesën e ish-ministrit Ilir Beqajt në Vlorë
