Vijojnë replikat, LVV i reagon LDK: Aktivisti mbante logon brenda qendrës së votimit

Lëvizja Vetëvendosje, dega në Prishtinë ka reaguar lidhur me fotografimin e një aktivisti të LDK-së nga ministri i Punëve të Brendshme, Xhelal Sveçla. Sipas Vetëvendosjes, rreth orës 10:30 është parë një aktivist i Lidhjes Demokratike të Kosovës, Art Merkoja i cili mbante logon e LDK-së brenda hapësirës së qendrës së votimit.

Vetëvendosja thekson se shfaqja e zyrtarëve partiakë me emblema të subjektit politik në qendrat e votimit paraqet shkelje të rregullave zgjedhore dhe ushtron presion mbi votuesit. LVV thekson se veprimet e tilla bien ndesh me Rregullat Zgjedhore të miratuara nga Komisioni Qendror i Zgjedhjeve (KQZ), me nenin 37 të Ligjit për Zgjedhjet e Përgjithshme dhe me nenin 8 të Rregullores Zgjedhore 07/2024.

Më tej në reagim, LVV ka kërkuar që Lidhja Demokratike e Kosovës të distancohet nga çdo shkelje ligjore dhe të mos mbrojë zyrtarët që, sipas saj, kanë vepruar në kundërshtim me ligjin.

“Vënia në mbrojtje të shkelësve të ligjit, e aq më shumë të zyrtarëve të saj, tregon qartë për qëllimin e këtij subjekti për presion ndaj votuesve”, thuhet në reagim.

Vetëvendosja thekson se mbetet e përkushtuar në mbrojtjen e demokracisë, të drejtës për votë të lirë dhe në denoncimin e çdo shkeljeje që cenon integritetin e procesit zgjedhor.

LEXONI GJITHASHTU:

• Kërcënoi me armë zjarri një shtetas, arrestohet 42-vjeçari në Tepelenë
• Thyerja e heshtjes zgjedhore, Celibashi: E ndaluar që të bëjnë thirrje elektorale