Viti i ri shkollor nis me 100 mijë nxënës më pak se në 2018

Mëngjesin e kësaj të hëne në Shqipëri, 386 mijë nxënës i janë drejtuar bankave të shkollës për të filluar sezonin e ri arsimor 2019-2020.

Sipas të dhënave nga Ministria e Arsimit, rreth 24 mijë nxënës fillojnë shkollën për herë të parë ,272 mijë të tjerë janë në arsimin bazë ndësa 90 mijë i drejtohen gjimnazit.

Shkollat në Shqipëri vazhdojnë të përballen me sfidën e uljes së numrit të nxënësve dhe për pasojë mbylljen e shumë klasave. Të dhënat e Ministrisë së Arsimit tregojnë se në numri i nxënësve të regjistruar në arsimin 9-vjeçar është 13 mijë nxënës më pak se një vit më parë.

Që nga viti 1992, numri i nxënësve në shkolla është ulur gjithësej me 200 mijë nxënës.

Emigrimi mbetet një arsye e fortë e braktisjes së shkollës. Për më tepër, rritja e çmimit të librave dhe mjeteve shkollore e ka vështirësuar gjendjen ekonomike për shumë familje.Të dhënat e Institutit të Statistikave (INSTAT), tregojnë se çmimi i librave dhe mjeteve shkollore u rrit me 7.6 për qind në muajin gusht të 2019 në krahasim me një vit më pare.

Në vitet e tjera ky ndryshim ishte më pak se 3 për qind.

Tregtarët e kancelarive justifikojnë rritjen e çmimeve me argumentin se rritja e tarifave po diktohet nga zëvendësimi i produkteve më të lira me produkte më të shtrenjta.