Vizita e Kurtit në RMV, Petkoviç: Pjesë e projektit të tij për Shqipërinë e Madhe

Vizita e kryeministrit të Kosovës Albin Kurti, në Maqedoninë e Veriut duket se nuk është pritur mirë në Serbi.

Drejtori i zyrës për Kosovën në Beograd, Petar Petkoviç, i cilësoi takimet e Kurtit me shqiptarët e Maqedonisë së Veriut si pjesë përbërëse të planit idelogjik të tij për ndërtimin e Shqipërisë së Madhe.

“Duke e shpallur veten si mentor politik dhe ideologjik i atyre që do të destabilizonin dhe ndanin Maqedoninë e Veriut, Kurti e shtriu misionin e tij luftarak nga Kosova në territoret përreth, të cilat ai i konsideron si pjesë përbërëse të projektit të tij të çmendur të shtetndërtimit të Shqipërisë së Madhe”, deklaroi Petkoviç.

Kujtojmë se reagime kundër vizitës së kryeministrit të Kurtit në Maqedoninë e Veriut pati dhe nga Ramush Haradinajt, i cili e akuzoi kryeministrin se po tenton të mashtrojë shqiptarët që banojnë në këtë shtet.

“Të dashur bashkombas shqiptarë në Maqedoni të Veriut,

Mos i besoni mashtruesit Albin Kurti. Në Kosovë i ka bllokuar të gjitha rrugët e projektet, përfshirë edhe rrugën e Plavës.

Pasi nuk mund t’i gënjej më kosovarët, paska ardh të ju mashtrojë ju, për rrugën Tetovë – Prizren.

Edhe në Shqipëri tentoi njëjtë, por nuk i besuan dhe e përzunë. As ju mos bini pre e mashtrimeve të tij”, shkroi Haradinaj në facebook.

LEXONI GJITHASHTU:

• Kurti kërkon nisjen e punimeve në ndërtimin e rrugës Prizren-Tetovë
• Qeveria e re në Malin e Zi, Berishaj: Posti i lartë që mund të marrë Nik Gjeloshaj