Vlorë: I vodhi me dhunë një shtetaseje të huaj çantën, arrestohet 17-vjeçari

Policia e Vlorës ka vënë në pranga dy shtetas të dyshuar për vepra të ndryshme penale, duke finalizuar dy raste hetimore brenda pak orësh.

Pas marrjes së kallëzimit nga një shtetase filipinase, se një person i kishte vjedhur me dhunë, në rrugë, çantën me një shumë parash dhe sende personale, Policia ka bërë të mundur arrestimin e autorit me iniciale O. S., 17-vjeçar, banues në Vlorë.

Gjatë kontrollit, policia sekuestroi çantën e grabitur, së bashku me një celular, dokumente identifikimi dhe karta bankare, të cilat iu rikthyen pronarës.

Në një tjetër operacion, Policia Vlorë ka ndaluar një shtetas me iniciale A. L., 42 vjeç nën akuzën për armëmbajtje pa leje.

Ai ishte shpallur në kërkim pas një vendimi të Gjykatës së Vlorës, e cila më 21 prill 2023 kishte caktuar ndaj tij masën e sigurisë “Arrest në burg” për veprën penale “Mbajtja pa leje dhe prodhimi i armëve, armëve shpërthyese dhe municionit”.

Materialet iu referuan Prokurorisë, për të dyja rastet, për veprime të mëtejshme.

LEXONI GJITHASHTU:

• Makina del nga rruga në Vlorë, plagosen 2 shtetas të huaj
• VIDEO| Vodhi 6000 euro në një hotel në Ksamil, arrestohet hajduti serial