Vlorë, murale me portretet e 40 firmëtarëve të Aktit të Pavarësisë!

Me afrimin e festave të Nëntorit, një ndër aktivistët për çëshjtet kombëtare, njëherësh artist, Bledar Çakalli po realizon në Vlorë muralen me ngjyrat kuqezi, ku në të pasqyrohen 40 firmëtarët që vulosën Pavarsinë e Shqipërisë. Për të kjo vepër është një thirrje gjaku për të mbajtur gjallë historinë kombëtare.

“Qëllimi është shumë i madh, atdhedashuria nuk është vetëm për festat e Nëntorit, kështu që do të përcjell një mesazh për mbajtjen gjallë të historisë së kombit shqiptar. Janë 40 figurat e Pavarësisë që kanë firmosur që Shqipëria të jetë shtet i pavarur, dhe shumë pak e dinë ose shumë pak i njohin figurat e tjera, përveç Ismail Qemalit dhe Isa Boletinit, që janë dy figura legjendare të kombit”, tha artisti.

Si stërnip i një prej dëshmorëve të luftës, 32-vjeçari e tregon atdhedashurinë në rreshtat që thotë:

“E shoh si detyrë këtë punë, nuk do të përfundojë në datë 28, pritet të përfundojë nga dhjetori. Mjafton ta bësh me dëshirë dhe ta duash dhe ta ndjesh peshën e kombit ose të kauzës që përfaqëson. Mesazhi është shumë i qartë: Ne s’kemi pse fajësojmë Shqipërinë, këtë tokë që është një tokë shumë e vjetër, një histori lavdie, për disa figura që e kanë shkatërruar këtë”, e mbyll fjalën e tij artisti Bledar Çakalli.

Kjo murale me heronjtë Kombëtar që firmosën lirinë e vendit po realizohet përgjatë aksit nacional Vlorë-Orikum ne Jonufër dhe pritet të përfundojë në dhjetor.

LEXONI GJITHASHTU:

• “Nuk ka kushte”/ Treg “mesjetar” në Vlorë, ankohen tregtarët dhe blerësit
• Vlora “pushtohet” nga tymi, përfshihet sërish nga flakët fusha e mbetjeve