VMRO-DPMNE interpelancë ndaj Talat Xhaferit për ‘shkelje dhe keqmenaxhim’

Partia opozitare në Maqedoninë e Veriut VMRO-DPMNE do të dorëzojë iniciativë për interpelancë ndaj kryetarit të Parlamentit Talat Xhaferi për shkak të, siç thonë ata, të shkeljeve dhe keqmenaxhimit.

Koordinatori i grupit parlamentar të kësaj partie Nikolla Micevski tha ditëve të fundit se Xhaferi ka dëshmuar se nuk është i denjë për atë post.

Ai pretendon se Xhaferi ka mbyllur deputetët në sallën e Kuvendit me çelës dhe ka ofenduar të punësuarit në Parlament.

“Për Talat Xhaferin nuk ekziston rregullore apo të drejta të njeriut. Ky autokrat ka hyrë në film se është i paprekshëm, prandaj doemos duhet të shkojë sa më larg nga tempulli i demokracisë. Ky është njeriu që ia lejon vetes të hedhë në shportë amendamente të opozitës, të nënçmojë të punësuar në Parlament të cilët refuzojnë t’i zbatojnë urdhrat e tij të paligjshme”, tha Nikolla Micevski, koordinator i VMRO DPMNE në Parlament.

Por, kabineti i Xhaferit thotë opozita po e shkel demokracinë dhe se vendimi për mbylljen e dyerve ka qenë në përputhje me rregulloren e shtëpisë ligjvënës në momentin kur votohet në mënyrë nominale.

“Dyert e sallës ishin të mbyllura që shërbimet e Kuvendit të konstatojnë numrin e deputetëve të pranishëm, për të parë nëse ka kuorum për votim. Neni 97 i Rregullores së Kuvendit të Republikës së Maqedonisë së Veriut, parashikon që gjatë votimit nominal të deputetëve, dyert e sallës në të cilën mbahet seanca e Kuvendit të mbyllen dhe nuk lejohet hyrja dhe dalja e deputetëve derisa zgjat votimi”, sqaron zyra e shtypit e Parlamentit.

Tashmë prej disa ditësh opozita në RMV, VMRO-DPMNE po proteston në Parlament duke bllokuar ligje dhe punën e Kuvendit, duke kërkuar që vendi të shkojë në zgjedhje.