Von der Leyen pritet sot në Tiranë, nis vizitën katërditore në Ballkanin Perëndimor

Kryetarja e Komisionit Evropian, Ursula von der Leyen, nis sot vizitën katërditore në Ballkanin Perëndimor, ku do të takohet me liderët e Shqipërisë, Maqedonisë së Veriut, Bosnjës dhe Hercegovinës, Serbisë, Kosovës dhe Malit të Zi.

Kjo do të jetë një mundësi për të diskutuar progresin e partnerëve tanë të Ballkanit Perëndimor në rrugën drejt BE-së, si dhe Planin e Rritjes prej 6 miliardë eurosh të BE-së.

Von der Leyen, pritet të mbërrijë sot në Tiranë, ku do të takohet me Kryeministrin e Shqipërisë, Edi Rama. Ajo gjithashtu do të mbajë një fjalim në ceremoninë e hapjes së vitit akademik në kampusin e Kolegjit të Evropës në Tiranë.

Ajo pritet të qëndrojë në Shqipëri dhe të enjten është parashikuar të mbajë një takim me presidentin e Republikës së Shqipërisë Bajram Begaj.

Gjithashtu të enjten, ajo do të udhëtojë në Shkup për t’u takuar me Kryeministrin e Maqedonisë së Veriut, Hristijan Mickoski, dhe me Presidenten Gordana Siljanovska–Davkova. Më pas, do të vizitojë Jablanicën në Bosnjë dhe Hercegovinë, për të parë zonat e goditura nga përmbytjet.

Të premten në mëngjes, Presidentja do të jetë në Sarajevë, ku do të takohet me Presidencën e Bosnjës dhe Hercegovinës, si dhe me Kryetaren e Këshillit të Ministrave, Borjana Krišto.

Më pas, do të udhëtojë në Beograd për t’u takuar me Presidentin e Serbisë, Aleksandër Vuçiç, dhe Kryeministrin Milosh Vuçeviç.

Të shtunën, Presidentja do të vizitojë Prishtinën, ku do të takohet me Presidenten e Kosovës, Vjosa Osmani, dhe Kryeministrin Albin Kurti.

Vizita e saj përfundon në Podgoricë, ku do të ketë takime me Presidentin e Malit të Zi, Jakov Milatoviç, dhe Kryeministrin Milojko Spajiç.

Presidentja do të mbajë konferenca për media gjatë të gjitha vizitave, të cilat do të transmetohen në kanale të ndryshme mediatike. Kjo vizitë thekson angazhimin e BE-së për të forcuar lidhjet me Ballkanin Perëndimor dhe për të mbështetur progresin e tyre drejt anëtarësimit në BE.

LEXONI GJITHASHTU:

• Ursula von der Leyen viziton nesër Tiranën, zbardhet agjenda
• Von der Leyen takon liderët e Ballkanit Perëndimor