Von der Leyen viziton zonat e përmbytura në Itali: Evropa është me ju

Pamjet tronditëse të përmbytjeve që përfshinë rajonin e Emilia Romanjës, në veri të Italisë, janë parë nga afër nga presidentja e Komisionit Evropian, Ursula Von der Leyen.

Përmbytjet kanë lënë 15 të vdekur, mbi 20 mijë të evakuuar dhe dëme materiale milionere. E shoqëruar nga kryeministrja Giorgia Meloni, Von der Leyen është përpjekur të qetësojë të prekurit.

“Evropa është me ju”, u ka thënë ajo banorëve.

Qeveria italiane ka njoftuar një paketë ndihmash prej 2 miliardë eurosh. Presidentja e Komisionit Evropian pranoi se nevoja për ndihmë është urgjente.

“Është urgjente të lëvrojmë fondin e solidaritetit. Ai ka një rregull të qartë: një parapagesë e vogël që do të bëhet për çdo katastrofë, por më pas duhen llogaritjet e dëmeve në mënyrë që të kemi një ide të qartë për kontributin evropian,” – u shpreh Von der Leyen.

Italia ka nevojë për asistencën ekonomike të BE-së dhe Von der Leyen konfirmoi se Unioni do të jetë përkrah Italisë gjatë emergjencës. Por është po ashtu e vërtetë se për shkak të motit ekstrem tragjeditë natyrore po bëhen më të shpeshta në Evropë. Ndaj BE-së do t’i duhet të përballet me to jo vetëm në Itali por dhe në zona të tjera të kontinentit.

LEXONI GJITHASHTU:

• VIDEO| Qëllohet me raketa spitali në Ukrainë, 1 viktimë dhe 15 të plagosur
• Lautaro ’heroi’ i Inter, zikaltrit fitojnë Kupën e Italisë