Vota e diasporës, sa është shifra e emigrantëve të regjistruar në 2 ditë

Rreth 9 mijë emigrantë të regjistruar në vetëm 2 ditët e para, këto janë shifrat e para që ka prodhuar procesi i regjistrimit të votuesve nga diaspora në procesin e 11 majit.

Platforma e ndërtuar nga KQZ, ka nisur të funksionojë që prej të shtunës dhe në këto orë të para, kanë qenë të pakta problematikat që janë hasur nga përdoruesit të cilët kanë kërkuar asistencë nga stafi i KQZ.

Numri më i lartë i të regjistruarve është nga Italia, Greqia, Gjermania, Britania e Madhe dhe SHBA, vende ku edhe diaspora shqiptare është më e madhe.

Ndërkohë që qytetet nga ku ka më tepër emigrant që pritet të votojnë më 11 maj janë, Tirana, Durrësi, Fieri, Shkodra, Lushnja dhe Vlora.

Mirëpo edhe pse ka nisur faza e parë, ende nuk janë zgjidhur të gjitha problematikat për zbatimin e votës së diasporës. Antuela Male nga KRIK, thotë se për këtë çështje ka ende disa mangësi në legjislacion.

Sipas saj, vonesa në miratimin e akteve nënligjore për votën e diasporës ngre disa pikëpyetje mbi këtë proces.

Më herët gjatë fundit të vitit të shkuar dhe në ditët e para të 2025-ës kanë diskutuar rreth mundësive për të ndërhyrë në Kodin Zgjedhor. Këto ndryshime do të mundësonin afrimin e regjistrimin e kandidatëve dhe partive, çka do të bënte që fleta e votimit të prodhohej dhe dërgohej më shpejt votuesve të diasporës.

LEXONI GJITHASHTU:

• ​Kur dhe si do të votojë diaspora në Kosovë, afatet dhe mënyrat
• Çeka shpjegon: Pse vota e diasporës është kyçe për politikën shqiptare!