Voton kandidati i LVV për Prishtinën, Çeku: Dita e zgjedhjeve duhet të jetë festë

Kandidati për kryetar të Prishtinës nga radhët e Lëvizjes Vetëvendosje, Hajrulla Çeku, ka hedhur votën e tij këtë të diel.

Ai ushtroi të drejtën e votës i shoqëruar nga bashkëshortja dhe dy vajzat.

Pas votimit, Çeku foli për mediat, ku theksoi se dita e zgjedhjeve duhet të jetë ditë feste, duke theksuar se fushata ishte e qetë dhe konstruktive, e cila, sipas tij, u përmbyll në mënyrën më të mirë me fitoren e Shqipërisë ndaj Serbisë në futboll.

“Sot jemi për të ushtruar të drejtën demokratike të votës. Sot përcaktojmë se kush do ta drejtojë qytetin tonë në katër vitet e ardhshme. Shpresoj që gjithçka të shkojë mbarë,” u shpreh Çeku.

I pyetur nga gazetarët për vonesën në orarin e parashikuar për të votuar, ai tha:

“Sot duhet të jemi pozitivë dhe t’i inkurajojmë qytetarët të marrin pjesë në votime,” duke falënderuar gjithashtu mediat për informimin dhe përcjelljen e procesit zgjedhor.

LEXONI GJITHASHTU:

• Serbët e Mitrovicës së Veriut votojnë në grup, i prin kreu i Listës Serbe
• Voton kreu KQZ-së, Radoniqi: Kemi përmirësuar platformën e publikimit të rezultateve