Vrasja e 25-vjeçarit nga polici, xhaxhai: Nuk kishte armë, por dy hurma në dorë

Xhaxhai i Klodjan Rashës, 25-vjeçarit që u vra me armë nga efektivi policisë është shprehur për mediat se nipi i tij mbrëmjen e djeshme kishte dalë për të konsumuar një kafe.

Xhaxhai nënvizoi se 25-vjeçari nuk ka qenë i armatosur, por në duar ka pasur vetëm dy hurma. 

“Klodiani ka pasur probleme nervore. Ka qene i sëmurë, madje është shtruar dhe në spital. Mbrëmjen e djeshme doli për të konsumuar një kafe, në dorë kishte vetëm dy hurma dhe jo armë”, u shpreh ai.

Sipas xhaxhait të të riut, fillimisht familjarëve u është komunikuar se 25-vjeçari ka bërë aksident dhe më pas u është thënë se ka ndërruar jetë. 

“Ditën e djeshme ka punuar me vëllain(të atin). Gjatë ditës fillimisht na kanë thënë është arrestuar, më pas ka bërë aksident dhe më vone na është thënë që ka ndërruar jetë”, u shpreh ai më tej. 

Ngjarja e rëndë ndodhi në orët e para të mëngjesit të sotëm në zonën e Laprakës në Tiranë, ku 25-vjeçari Klodjan Rasha u qëllua për vdekje nga efektivi i “Shqiponjave” me iniciale N.H. 

Polici qëlloi me armë zjarri në drejtim të 25-vjeçarit, pasi ky i fundit nuk iu bind urdhrit për të ndaluar. Sipas policisë i riu u largua me vrap, ndërkohë që policit i drejtoi një armë zjarri tip pistoletë. 

Në këto momente efektivi qëlloi me armë zjarri në drejtim të të riut, duke e lënë të plagosur. 

Rasha humbi jetën në spital.

Lexoni gjithashtu:

Nuk iu bind urdhrit të Policisë, efektivi vret me armë zjarri 25-vjeçarin në Tiranë