Vrasja e 3-fishtë në Gjilan, MD: Të nisin hetimet ndaj gjyqtarëve që liruan autorin

Ministria e Drejtësisë në Kosovës ka reaguar pas ngjarjes së rëndë që ndodhi në Gjilan, ku humbën jetën tre qytetarë, duke theksuar se Mefail dhe Edonis Shkodra, të dyshuar për këtë vrasje të trefishtë dhe aktualisht në arrati, kishin qenë më parë në paraburgim dhe ishin liruar me vendim të Gjykatës Themelore në Prishtinë, bazuar në kërkesën e Prokurorisë Speciale të Republikës së Kosovës.

Sipas MD-së, ky vendim është i pakuptueshëm dhe i papranueshëm, sidomos duke pasur parasysh që të dy të dyshuarit ishin subjekt i hetimeve për vepra të rënda penale si fajdeja dhe detyrimi.

“Lirimi i tyre përbën një neglizhencë të rëndë institucionale dhe ka prodhuar pasoja tragjike e të pariparueshme. Ministria e Drejtësisë i bën thirrje Këshillit Prokurorial të Kosovës dhe atij Gjyqësor, që të nisin menjëherë procedurat disiplinore ndaj të gjithë prokurorëve e gjyqtarëve që kanë qenë të përfshirë. Përgjegjësia ligjore, institucionale dhe morale duhet të jetë e plotë dhe e pakompromis”, thuhet në reagim.

Gjithashtu, Ministria u bën thirrje të gjitha forcave politike që të ndalin pengesat e vazhdueshme ndaj reformave në sistemin e drejtësisë.

LEXONI GJITHASHTU:

• Kushtetuesja foli, po tani çfarë ndodh me Kuvendin e Kosovës?
• Ben Blushi: Një krahasim mes Palestinës, Kosovës dhe Maqedonisë së Veriut