Vrasja e biznesmenit në Tiranë, merren në pyetje familjarët, zbërthehet telefoni

Familjarët e biznesmenit Bujar Nasufi i vrarë në një atentat dy ditë më parë në Tiranë janë marrë sërish në pyetje.

Dëshmia e tyre nuk e ka ndihmuar grupin hetimor për të kuptuar më shumë për konfliktet që mund të ketë pasur 56-vjeçari.

Ndërsa telefoni i viktimës është dërguar në policinë shkencore për ekspertim ku do të verifikohen komunikimet që ka pasur kohët e fundit, nëse do t’i shërbejnë hetimit.

56-vjeçari Bujar Nasufi u vra mbrëmjen e së dielës sapo doli nga mobilieria e tij në rrugën “Irfan Tomini” dhe me automjetin e tij tip “Benz” ngjyrë gri, iu drejtua banesës në rrugën “Myrte Zeneli”. Autori, i maskuar dhe duke përdorur një motor si shpërndarës picash, e ndoqi viktimën deri pranë banesës së tij.

Sapo bashkëshortja e Nasufit zbriti nga makina, autori, e qëlloi nga një distancë shumë e afërt me një armë zjarri të tipit pistoletë.

Gjithsej u qëlluan gjashtë plumba, dy prej të cilëve rezultuan fatalë për 56-vjeçarin.

Sa i përket motiveve të ngjarjes, policia nuk ka arritur ende të zbulojë konflikte të hapura të viktimës, pasi ai njihej si person i qetë dhe pa precedentë penalë.

Pista kryesore e hetimeve lidhet me konflikte të mundshme për çështje pronësie.

Familja Nasufi, me origjinë nga Tirana, e përbërë nga katër vëllezër, jeton në zonën e Selitës që prej periudhës së diktaturës. Ata janë pronarë të disa bizneseve në rrugën “Irfan Tomini”.

Familjarët kanë deklaruar se ndarja e pronave është bërë herët dhe nuk ka pasur probleme mes vëllezërve. Viktima, rezulton si baba i një djali 6-vjeçar, ai njihej si një qytetar i rregullt dhe i respektuar në komunitet.

LEXONI GJITHASHTU:

• Atentati ndaj biznesmenit në Tiranë, gjendet i djegur motori i autorit
• EMRI| Atentat me armë zjarri në Vlorë, vritet në makinë 30-vjeçari