Vrasja e djalit të ish-gjyqtarit në SPAK, dyshohet se u krye nga një grup kriminal

Pas masakrës së Dobraçit, edhe vrasja e Klaudio Prendit pritet të kalojë në SPAK. Hetuesit dyshojnë se edhe në këtë ngjarje është i përfshirë një grup i strukturuar kriminal.

Vrasja e Klaudio Prendit pritet t’i kalojë për kompetencë dhe hetime të mëtejshme Prokurorisë së Posaçme. SPAK do të hetojë ekzekutimin e të riut, i cili u vra me armë me silenciator në zonën e Porcelanit, pasi ka dyshime se pas ngjarjes së rëndë fshihet një grup i strukturuar kriminal.

Hetuesit janë bindur pas analizës së të dhënave se si kanë vepruar autorët. Një mjet i dytë ka larguar autorët, pasi ata dogjën makinën që u përdor në vrasje pranë liqenit të Farkës. Po ashtu, dyshohet se kemi të bëjmë me vrasës me pagesë.

Pista kryesore ku janë shtrirë hetimet për vrasjen e Klaudio Prendit janë konfliktet që viktima ka pasur, duke u përjashtuar pista për shkak të detyrës si ish-gjyqtar të të atit, Fran Prendi. Po ashtu, po hetohet edhe për lidhjet e viktimës jashtë vendit, ndër to edhe në Dubai, ku ai kishte zhvilluar disa udhëtime.

Kjo është dosja e dytë brenda një kohe të shkurtër për ngjarje të rënda kriminale që kalon në SPAK, pas asaj të Dobraçit me 4 viktima.

LEXONI GJITHASHTU:

• Atentat me armë zjarri në Tiranë, vritet djali i ish-gjyqtarit
• Atentati mafioz me silenciator ndaj djalit të ish-gjyqtarit, të gjitha detajet