Vrasja e Egli Progës në Pogradec, ILD nis verifikimin e dosjes

Inspektori i Lartë i Drejtësisë, ILD ka nisur verifikimet për rastin e vrasjes së Egli Progës në Pogradec.

ILD ka kërkuar nga Prokuroria dhe Gjykata e Korçës të gjithë dosjen hetimore për të verifikuar nëse është respektuar ligji për regjistrimin e veprës penale “vrasje nga pakujdesia” dhe në seancën për caktim të masave te sigurimit.

Ngjarja e ndodhur disa ditë më parë në Pogradec ka shkaktuar reagim të madh dhe indinjatë në opinionin publik.

Fillimisht u raportua se 42-vjeçari në gjendje të dehur ishte rrëzuar në rrugë dhe nuk i kishte mbijetuar dot plagëve të marra.

Por, pas hetimeve, u zbulua se ishte dhunuar nga i riu, Denis Meçe. Ky i fundit u konfliktua fizikisht me Egli Progën dhe më pas është larguar. Proga është gjetur i shtrirë në rrugë dhe u dërgua në spital, por nuk arriti që t’i mbijetojë dëmtimeve të marra.

29-vjeçari është vendosur në prangat e policisë dhe gjykata e Korçës ka caktuar ndaj tij masën e sigurisë arrest me burg me akuzën e vrasjes nga pakujdesia.

Ndërkohë, për tre persona të tjerë, Voltan Shulku, Arian Manellari dhe Leonidha Guçe, që akuzohen për moskallëzim krimi, gjykata vendosi detyrim paraqitjeje.