Vrasja e Pjerin Xhuvanit, shtyhet në Apel seanca për ish-efektivin e RENEA-s 

Është shtyrë në Apelin e Përgjithshëm seanca për ish-efektivin e RENEA-s Arbër Paplekaj i cili kundërshton vendimin e Gjykatës së Elbasanit që e dënoi me 22 vjet burg.

Shkak për shtyrjen është bërë mungesa e prokurorit të çështjes, Gent Xholi për arsye familjare. Seanca e radhës do të mbahet më 4 mars në orën 09:30.

Në korrik të vitit të shkuar Gjykata e Elbasanit dënoi me 22 vite burg Arbër Paplekajn, për vrasjen e Pjerin Xhuvanit në vitin 2021, 4 ditë përpara zgjedhjeve të përgjithshme parlamentare. Gjatë seancës për dhënien e pretencës, organi i akuzës kërkoi 25 vite burg për ish-komandon.

Ngjarja e rëndë ndodhi në Elbasan më 21 prill 2021, ku Arbër Paplekaj si pjesë e Strukturës së Mbrojtjes së Votës të ngritur nga partia Demokratike, u përplas me mbështetësit e Partisë Socialiste dhe gjatë shkëmbimit të zjarrit humbi jetën Pjerin Xhuvani, si dhe u plagos efektivja Xhensila Sota dhe tre persona të tjerë.