Pas deklaratës për media të Drejtorit të Përgjithshëm të Policisë së Shtetit, Muhamet Rrumbullakut ka reaguar edhe kryeministri Edi Rama për ngjarjen në Pogradec, ku mbeti i vdekur Egli Proga.

Përmes një postimi në platformën X, kryeministri hodhi poshtë akuzat e ngritura ndaj Policisë së Shtetit,lidhur me minimizimin e ngjarjes.

Rama tha se sot policia vërtetoi përmes provave se akuzat ndaj kësaj strukture ishin të pabaza, njësoj edhe për shërbimin e urgjencës.

Sa i takon akuzës së ngritur ndaj autorit të ngjarjes, “vrasje nga pakujdesia” , Rama tha se pavarësisht vendimeve gjyqësore, nuk mund të kenë lidhje me detyrën e Policisë së Shtetit dhe Urgjencës Kombëtare.

Deklarata e plotë:

“Sot Policia e Shtetit dhe Urgjenca Kombëtare dhanë publikisht provat që hedhin poshtë agresionin e neveritshëm ndaj tyre lidhur me ngjarjen tragjike të Pogradecit, ku policia u akuzua pa asnjë bazë sikur tentoi të fshihte ngjarjen, ndërsa urgjenca sikur u vonua tejmase në dhënien e ndihmës për viktimën. Në fakt të gjitha provat tregojnë e dokumentuara, qoftë të operacionit policor e qoftë të sistemit elektronik të Urgjencës Kombëtare tregojnë, se Policia e arrestoi në kohë rekord autorin për ‘Vrasje me dashje’ dhe Urgjenca iu përgjigj në 7 minuta thirrjes për ndihmë!

‘Vrasja nga pakujdesia’ e ngritur si akuzë nga Prokuroria, e cila tingëllon e pakuptueshme për këdo që është njohur me dinamikën e kësaj ngjarjeje tragjike, nuk ka asnjë lidhje me Policinë e Shtetit apo me punonjësit e urgjencës, të cilët e kanë kryer detyrën me profesionalizëm dhe integritet të plotë ligjor e moral. Ky është edhe konkluzioni i Agjencisë së Mbikqyrjes Policore, e cila është  angazhuar nga Ministria e Brendshme, menjëherë pas daljes së pretendimeve apo fabrikimeve mbi rrjedhën e ngjarjes, duke kryer kontrollin e të gjitha hapave të operacionit për kapjen e autorit të vrasjes.

Duke mos komentuar qëndrimin e organeve të drejtësisë, por duke mirëkuptuar plotësisht indinjatën e kujtdo që ndjehet i skandalizuar nga akuza e ngritur nga Prokuroria, bashkohem me thirrjen e Policisë së Shtetit për të gjitha burimet e përgjegjshme të informimit, që t’i referohen dokumentave të operacionit të policisë si edhe të shërbimit të urgjencës, për të luftuar dizinformimin dhe keqinformimin e qëllimshëm të publikut, duke luajtur me një vdekje tragjike për lloj-lloj motivesh të dobëta politike, mediatike apo edhe thjesht jonjerëzore.”