Vritet një tjetër gazetar në Meksikë, kishte marrë kërcënime për shkak të raportimeve

Një gazetar i pavarur u vra në orët e para të së enjtes, tha gazeta për të cilën ai punonte në shtetin lindor të Veracruz, ku një koleg u vra në janar. Luis Angel Lopez Valdes kishte marrë kërcënime për shkak të punës së tij si gazetar dhe po mbrohej nga autoritetet lokale, raportoi gazeta Vanguardia në mediat sociale.

López Valdés u vra në qytetin e Posa Rikës kur u shënjestrua nga “persona të armatosur ndërsa ecte” në një rrugë, shpjegoi gazeta në edicionin e saj dixhital.

Gazeta bëri thirrje që vrasja e gazetarit të saj “të mos mbetet e pandëshkuar”.

Meksika është një nga vendet më të rrezikshme në botë për gazetarët. Më shumë se 150 gazetarë janë vrarë që nga viti 1994, sipas organizatës joqeveritare Reporterë pa Kufij (RSF).

Shumë nga gazetarët e vrarë punonin në zona të shkatërruara nga krimi i organizuar.

Veracruz, një shtet në Gjirin e Meksikës, vitet e fundit është bërë një skenë përleshjesh të dhunshme midis organizatave të ndryshme kriminale që konkurrojnë për kontrollin e rrugëve të trafikimit të drogës.

Në janar, Carlos Castro, një gazetar që mbulonte raportimet policore për agjencinë e lajmeve Codigo Norte, u qëllua për vdekje në shtet.