Tre ditë para zgjedhjeve parlamentare në Gjermani, vendi ndodhet në një situatë të tensionuar politike, mes pasigurive të brendshme dhe përplasjeve në distancë midis Bashkimit Evropian dhe Shteteve të Bashkuara.
Një afrim i mundshëm i ish-presidentit Donald Trump me Rusinë dhe mbështetja e drejtpërdrejtë e zv. presidentit amerikan dhe e Elon Musk për partinë e ekstremit të djathtë AfD kanë ngritur shqetësime të mëdha në arenën ndërkombëtare.
Në një lidhje të drejtpërdrejtë për Euronews Albania, ish-ambasadori i Kosovës në Gjermani, Skënder Xhakaliu, komentoi për situatën para zgjedhjeve dhe mundësitë për formimin e qeverisë së re.
Sondazhet dhe mundësitë për qeverisje
“Sipas sondazheve të fundit, blloku konservator CDU/CSU kryeson me rreth 30% të votave, i ndjekur nga partia e ekstremit të djathtë AfD me rreth 20%.
Në vendin e tretë renditen socialdemokratët me 15 deri në 18%, ndërsa pas tyre vijnë të Gjelbërit dhe Liberalët,” u shpreh Xhakaliu.
Megjithatë, asnjë parti nuk duket se do të arrijë të sigurojë shumicën e nevojshme për të formuar e vetme qeverinë.
“Në qarqet politike dhe institucionet gjermane, diskutimi kryesor është se si do të formohet qeveria e re. CDU/CSU pritet të jetë forca kryesore, por nuk ka indikacione se do të bashkëpunojë me AfD-në për krijimin e një koalicioni qeverisës,” theksoi ai.
A ka ndikuar bashkëpunimi CDU-AfD në popullaritetin e tyre?
Një nga çështjet më të diskutuara mbetet votimi i përbashkët i CDU dhe AfD në parlament, i cili shkaktoi protesta dhe polemika të shumta në skenën politike.
“Megjithëse ky bashkëpunim ka nxitur debat dhe reagime të forta, sondazhet tregojnë se nuk e ka dëmtuar ndjeshëm mbështetjen për CDU-në.
Përkundrazi, kreu i kësaj partie ka shënuar një rritje të popullaritetit,” shtoi Xhakaliu.
Ndërhyrjet ndërkombëtare dhe afrimi i AfD-së me figura si Elon Musk dhe zyrtarë amerikanë e kanë komplikuar më tej situatën, duke ngritur pikëpyetje mbi të ardhmen politike të Gjermanisë dhe raportet e saj me partnerët ndërkombëtarë pas këtyre zgjedhjeve.
LEXONI GJITHASHTU:
- Orban: AfD është e ardhmja e Gjermanisë
- Skandal për ekstremistët, AfD akuza për shkelje të ligjit të donacioneve elektorale
