Xhubleta 4 mijë vjeçare në UNESCO! Margariti jep lajmin

Xhubleta është tashmë pjesë e trashëgimisë kulturore jomateriale botërore nën mbrojtjen e UNESCO- s.

Veshja tradicionale e grave të Malësisë, më shumë se 4 mijë vite e lashtë tashmë është pjesë e pasurisë së gjithë njerëzimit.

Nga mbledhja e komitetit ndërqeveritar për mbrojtjen dhe ruajtjen e trashëgimisë kulturore jomateriale që mbahet në Marok, ministrja e Kulturës Elva Margariti ka ndarë lajmin e mrekullueshëm.

“Komitetit ndërqeveritar për mbrojtjen dhe ruajtjen e trashëgimisë kulturore jomateriale sapo miratoi në formë unanime shpalljen e xhubletës dhe dijebërjes së saj si pjesë të listës së trashëgimisë kulturore jomateriale nën mbrojtjen e UNESCO- s”, tha Margariti.

Me një histori tejet të gjatë, kësaj copëze kaq të rëndësishme të mozaikut historik të kombit tonë dita- ditës po i kanosej zhdukja.

‘’Një thesar që në vrullin e kohës po rrezikonte dita-ditës të humbiste, por ne nuk duhet të lejojmë që xhubleta të mbetet thjesht një relike e së shkuarës dhe me përfshirjen në këtë listë, ajo do të ketë mbështetjen jo vetëm të institucioneve tona, por tashmë edhe të atyre ndërkombëtare”, shprehet ministrja.

Xhubleta është elementi i dytë shqiptar që i shtohet listës së trashëgimisë kulturore jomateriale botërore, pas isopolifonisë.

LEXONI GJITHASHTU:

• ‘Butrinti, pronë e shtetit’, Margariti: Po ndryshohet vetëm mënyra e menaxhimit
• 10 mijë dollarë pagesë, ministrja Margariti i përgjigjet Zhupës: Më sill dokumentin