Zaçaj mesazh Spiropalit: Vendimet e Kushtetueses janë të detyrueshme për t’u zbatuar

Kryetarja e Gjykatës Kushtetuese, Holta Zaçaj, ka dhënë një mesazh të qartë këtë të hënë gjatë ceremonisë së prezantimit të “Udhërrëfyesit për Jurisprudencën e Gjykatës Kushtetuese, Vëllimi II”, ku të pranishëm ishin gjithashtu kryetarja e Kuvendit, Elisa Spiropali, dhe ministri i Drejtësisë, Ulsi Manja.

Në fjalën e saj, Zaçaj vuri theksin te vendimet e Gjykatës Kushtetuese, duke paralajmëruar për pasojat që sjell çdo përpjekje për të vënë në diskutim ekzekutimin e tyre.

Zaçaj ka dhënë një mesazh të drejtpërdrejt ndaj Kryetares së Kuvendit Elisa Spiropali, ku i ka thënë se vendimet e Gjykatës Kushtetuese duhen zbatuar.

“Mos të harrojmë se, vendimet e Gjykatës Kushtetuese nuk janë as këshilluese, as opsionale për t’u zbatuar, ato janë të detyrueshme dhe ekzekutimi i tyre përbën një detyrim kushtetues për të gjitha pushtetet,” -u shpreh Zaçaj.

Ajo theksoi se ndikimi i vendimeve të kësaj gjykate nuk është vetëm historik, por edhe aktual, pasi ato formësojnë jurisprudencën dhe arsyetimin gjyqësor në Shqipëri.

“Këto vendime kanë udhëhequr arsyetimin e sotëm ligjor e gjyqësor, por Gjykata, në interpretimin e Kushtetutës si një ‘instrument i gjallë’, kujdeset që teksti i saj të jetë i aftë të përshtatet me sfidat dhe zhvillimet e reja, duke zhvilluar kështu edhe konceptet e saj,” -deklaroi Zaçaj.

Zaçaj paralajmëroi se çdo tendencë për të anashkaluar vendimet e saj cenon besimin publik në drejtësi dhe rrezikon themelet e qeverisjes demokratike.

“Përpjekjet për të kundërshtuar apo për të vënë në diskutim ekzekutimin e vendimeve të Gjykatës Kushtetuese jo vetëm minojnë besimin e publikut në sistemin e drejtësisë, por edhe destabilizojnë qeverisjen demokratike,” shtoi ajo.

Nga ana tjetër Spiropali në fjalën e saj tha se vendimet e Kushtetueses duhet të jenë më të qarta, pa vijuar në detaje duke lënë të kuptohej se ishte e papërgatitur për mesazhin e kryegjyqtares së Kushtetueses.

Mesazhi i Zaçajt vjen pas disa rasteve të mos zbatimit të vendimeve nga Kuvendi të vendimeve të Kushtetueses. Rasti që ka pasur më tepër vëmendje është vendimi i Kushtetuese për rrëzimin e mandatit të deputetes Olta Xhaçka.

LEXONI GJITHASHTU:

• Mandati i Kryetares së Gjykatës Kushtetuese, Holta Zaçaj i drejtohet “Venecias”
• Zaçaj iu drejtua Venecias për mandatin, GJL nis procedurat e zëvendësimit të saj