Kryetari i Partisë Socialiste, Edi Rama, mblodhi këtë të hënë në selinë rozë Kryesinë e Partisë Socialiste, ku u emërua një drejtues i ri politik për Dibrën.

Gjatë mbledhjes u zyrtarizua emri i Blendi Klosit si drejtues politik i qarkut të Dibrës nga radhët e PS-së.

Ky vendim i socialistëve vjen pas vakancës së krijuar në Dibër, me largimin e Blendi Gonxhes drejt Tiranës.

Gjithashtu, Kryesia e PS-së vendosi që Pirro Vengu të asistojë Bledi Çuçin në qarkun e Vlorës.

“Në mbledhje ka pasur edhe dy vendimmarrje. Dihej që Blendi Klosi, përveçse Sekretar i Përgjithshëm i Partisë Socialiste, është ngarkuar edhe me detyrën e drejtimit politik të qarkut të Dibrës. Kjo mbledhje ka shërbyer thjesht si një procedurë për të zyrtarizuar Blendi Klosin si drejtues politik të qarkut të Dibrës, pas largimit të Blendi Gonxhes drejt Tiranës.

Po ashtu, qarku i Vlorës është një tjetër qark që është përforcuar. Përveç Bledi Çuçit, ai do të ketë si mbështetës edhe ministrin e Mbrojtjes, Pirro Vengu,” bën me dije gazetarja e Euronews Albania, Enkelejda Mema.