Zbardhet plagosja e 36-vjeçarit në Shijak, konflikti mes 3 personave të tjerë

Është vënë në prangat e Policisë së Durrësit shtetasi Albano Domi, pronar i dyqanit me pjesë këmbimi ku ndodhi plagosja e 36-vjeçarit në Shijak.

Sipas hetimeve të Policisë, ka rezultuar se i plagosuri ka qenë një shtetas që ndodhej rastësisht në dyqan, gjatë një konflikti që Domi ka pasur me dy persona të tjerë, të cilët kanë qëlluar me armë zjarri.

Por është mësuar se edhe Domi i është kundërpërgjigjur atyre me armë zjarri, gjë që e ka çuar në pranga.

Po ashtu, është sekuestruar 1 armë zjarri pistoletë që dyshohet se e ka përdorur pronari i dyqanit, gjatë konfliktit.

Ndërkohë vijon punë për kapjen e dy autorëve të plagosjes së 36-vjeçarit.

Njoftimi:

Shijak/Zbardhet plagosja me armë zjarri e 36-vjeçarit.

Vihet në pranga pronari i dyqanit për pjesë këmbimi, ku ndodhi ngjarja.

Sekuestrohet 1 armë zjarri pistoletë që dyshohet se e ka përdorur pronari i dyqanit, gjatë konfliktit.

Vijon puna për lokalizimin dhe kapjen e 2 shtetasve që plagosën me armë 36-vjeçarin, i cili ndodhej në dyqan, gjatë konfliktit.

Strukturat hetimore të Komisariatit të Policisë Shijak, në bashkëpunim me strukturat hetimore të Drejtorisë Vendore të Policisë Durrës, në drejtimin e  Prokurorisë, në vijim të hetimeve  të thelluara për zbardhjen e ngjarjes së ndodhur në një dyqan për pjesë këmbimi, në Shijak, arrestuan shtetasin A. D., 27 vjeç, banues në Xhafzotaj (pronari i dyqanit ku ndodhi ngjarja).

Po në vijim të veprimeve hetimore, u bë shpallja në kërkim e shtetasve A. H., 30 vjeç dhe Xh. P., 33 vjeç, të dy banues në Durrës. Vijon puna intensive për lokalizimin dhe kapjen e tyre.

Nga hetimet rezultoi se për motive të dobëta, shtetasit A. H. dhe Xh. P. janë konfliktuar fizikisht me shtetasin A. D., dhe më pas kanë qëlluar me pistoletë në drejtim të tij. Si pasojë e të shtënave është plagosur dhe është jashtë rrezikut për jetën, shtetasi E. D., i cili ishte në dyqan kur ka ndodhur konflikti.

Po nga hetimet rezultoi se dhe pronari i dyqanit, shtetasi A. D. iu është kundërpërgjigjur me armë zjarri pistoletë, shtetasve A. H. dhe Xh. P.

Shërbimet e Policisë kanë gjetur dhe sekuestuar në cilësinë e provës materiale, 1 armë zjarri pistoletë që dyshohet se është përdorur nga shtetasi A. D. (pronari i dyqanit).

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme për shtetasin A. D., për veprat penale “Kanosja” dhe “Mbajtja pa leje dhe prodhimi i armëve, i armëve shpërthyese dhe municionit” dhe për shtetasit A. H. dhe Xh. P., për veprat penale “Vrasja me dashje”, mbetur në tentativë dhe “Mbajtja pa leje dhe prodhimi i armëve, i armëve shpërthyese dhe municionit”.

LEXONI GJITHASHTU:

• Plagosja e 36 vjeçarit në Durrës, gazetarja: Konflikti nisi 1 ditë më parë (Emrat)
• E qëlloi me plumb në këmbë, detaje nga plagosja e 36-vjeçarit: Identifikohet autori