Zbardhet raporti i PS për mandatin e Olta Xhaçkës

Mandati i deputetes, Olta Xhacka do të diskutohet këtë të enjtë në parlament.

Burime për Euronews Albania bëjnë me dije se në raportin e saj PS kërkon që çështja t’i kalojë seancës plenare për të vendosur në lidhje me dërgimin e mocionit në Gjykatën Kushtetuese sipas parashikimeve të nenit 70 të Kushtetutës.

Megjithatë nuk dihet ende nëse deputetët e PS do të votojnë pro apo kundër dërgimit të mocionit në Kushtetuese.

Ditën e mërkurë u bë publik dhe raporti i hartuar nga opozita, ku nënvizohet se mandati i Xhaçkës është i papajueshëm dhe duhet të shqyrtohet nga Gjykata Kushtetuese.

Sipas opozitës, ish-Ministrja e Jashtme nuk mund të vazhdojë të jetë deputete, pasi është në konflikt interesi me shpalljen nga qeveria të bashkëshortit të saj Artan Gaçi investitor strategjik. Në raport thuhet se ky i fundit, përmes shoqërisë  “AG.TCC”, ka përfituar nga pasuritë e shtetit.

Pas ankimimit në janarin e një viti më parë “Kushtetuesja” ia njohu këtë të drejtë opozitës dhe kërkoi që mandati i Olta Xhaçkës të shqyrtohet nga kjo gjykatë pasi të votohet në parlament.

Më shumë se një vit nga ky vendim i “Kushtetueses” që detyron Kuvendin të miratojë kërkesën e opozitës do të përcaktohet të enjten nëse fati i mandatit të Xhaçkës do të shqyrtohet ose jo në themel nga Gjykata Kushtetuese.

Ndërkohë, në rendin e diskutimeve, në seancë do të shqyrtohen edhe disa projekvendime, mes të cilave edhe pagat në Kolegjin e Apelimit dhe Komisionit të Pavarur të Kualifikimit.

LEXONI GJITHASHTU:

• “Zbatoni vendimin e Kushtetueses për Olta Xhaçkën”, Bardhi kërkesë Kuvendit
• Grupi parlamentar i PD publikon raportin për mandatin e Olta Xhaçkës