Zbulohen platforma me fara narkotike në Bratosh të Malësisë së Madhe

Policia e Shtetit ka zbuluar një rast të dyshuar të kultivimit të bimëve narkotike në fshatin Bratosh, në Malësinë e Madhe, në kuadër të operacionit të koduar “Faza e parë”.

Gjatë kontrolleve të ushtruara nga shërbimet e Komisariatit të Policisë Malësi e Madhe, në territorin e këtij fshati janë konstatuar platforma polistiroli ku ishin mbjellë fara të dyshuara si Cannabis Sativa.

Sipas policisë, platformat me farat e dyshuara narkotike janë asgjësuar në vend, ndërsa një pjesë e tyre është sekuestruar në cilësinë e provës materiale.

Ndërkohë, vijon puna për identifikimin dhe nxjerrjen përpara përgjegjësisë penale të autorëve të kësaj veprimtarie kriminale.

Policia njofton se operacioni antikanabis “Faza e parë” po vijon në të gjithë territorin e qarkut, me kontrolle intensive që synojnë parandalimin dhe goditjen në fazë të hershme të tentativave për kultivim të bimëve narkotike.