Zbulohet laborator droge në Sarandë, arrestohet administratori i pallatit, 4 në kërkim

Policia e Sarandës ka finalizuar me sukses operacionin policor të koduar “Administratori”, në kuadër të goditjes së veprimtarive kriminale në fushën e narkotikëve, bazuar në informacione nga inteligjenca informative dhe verifikime në terren.

Policia e Sarandës ka realizuar një operacion policor teksa në katin e nëntë të një pallati 9-katësh në lagjen nr. 2 të qytetit të Sarandës, në dy apartamente, u zbuluan ambiente të përshtatura për kultivimin e bimëve narkotike.

Kultivimi i tyre ishte i përshtatur me anë të llambave elektrike, si dhe për tharjen dhe përpunimin e tyre me qëllim shitjen. Nga hetimet rezultoi se këto ambiente furnizoheshin me energji elektrike përmes lidhjeve të paligjshme.

Si rezultat, u arrestua shtetasi E. B., 45 vjeç, banues në Sarandë, administrator i pallatit, i dyshuar për veprat penale “Prodhimi dhe shitja e narkotikëve”, “Kultivimi i bimëve narkotike” dhe “Vjedhja e energjisë elektrike ose impulsive telefonike”.

Gjithashtu, u shpallën në kërkim shtetasit E. Sh., 48 vjeç, S. H., 26 vjeç, T. M., 28 vjeç dhe A. M., 25 vjeçe, të dyshuar si të përfshirë në këtë aktivitet kriminal. Në vijim të veprimeve procedurale, u procedua penalisht edhe shtetasja M. B., 45 vjeçe, bashkëshortja e të arrestuarit.

Gjatë kontrollit, policia sekuestroi 157 bimë narkotike të dyshuara kanabis, të kultivuara në vazo, 18 kilogramë lëndë narkotike kanabis në gjendje të thatë, si dhe një sasi të madhe pajisjesh të përdorura për kultivim, përpunim dhe ventilim, përfshirë llamba elektrike, kondicionerë, ventilatorë, filtra ajri, pajisje elektrike dhe aparate celulare.

Policia vijon punën për kapjen e personave të shpallur në kërkim dhe për dokumentimin e plotë ligjor të kësaj veprimtarie kriminale.