Zelensky kërkon leje për përdorimin e armëve me rreze të gjata, pas sulmeve në Kursk

Presidenti i Ukrainës, Volodymyr Zelensky, u ka kërkuar sërish vendeve aleate ta lejojnë Ukrainën t’i përdorë armët me rreze të gjata veprimi për të kryer sulme thellë brenda Rusisë.

“Ukrainën e ndan vetëm një vendim nga ndalja e përparimit të ushtrisë ruse në vijën e frontit, për të cilin ne po i presim partnerët tanë: vendimi për armët me rreze të gjata veprimi”, tha Zelensky gjatë një fjalimi para ambasadorëve ukrainas.

Zelensky u tha gjithashtu diplomatëve se forcat ukrainase i kanë marrë nën kontroll 92 vendbanime në rajonin Kursk të Rusisë dhe se tani e kanë nën kontroll një territor të armikut me sipërfaqe prej 1.250 kilometrash katrorë.

Ushtria ukrainase  nisi një inkursion befasues në rajonin kufitar rus para dy javëve.

“Ne po vazhdojmë forcimin e pozicioneve tona, duke i stabilizuar zona të caktuara dhe duke mbushur fondin e këmbimit”, tha Zelensky duke iu referuar ushtarëve rusë që Ukraina i ka burgosur.

“Operacioni është gjithashtu investimi ynë më i madh në procesin e lirimit të ukrainasve nga robëria në Rusi. Ky është njëri prej synimeve tona”, theksoi Zelensky.

LEXONI GJITHASHTU:

• Inkursioni në Kursk, flet Zelensky: Qëllimi është krijimi i zonës tampon
• FBI konfirmon se Irani ka hakeruar fushatën e Donald Trump