Reagimet për zgjedhjen e Blerina Balës në krye të Himarës

Zgjedhja në krye të bashkisë së Himarës e Blerina Balës mes tensioneve në këshillin bashkiak, ka sjellë reagimin e kryeministrit Rama.

Përmes një postimi në rrjetet sociale kreu i qeverisë e cilësoi votimin në Këshillin Bashkiak një tregues të qartë se vullneti i shumicës së qytetarëve të Himarës nuk është përçarja dhe konflikti, por dëshira për të ecur drejt zhvillimit.

“Zgjedhja e sotme nga Këshilli Bashkiak të Himarës, me 15 vota pro dhe vetëm 4 kundër, e nënkryetares së bashkisë, Blerina Bala, si kryetare në detyrë është një zhvillim pozitiv për vazhdimin e punës së qeverisë vendore. Përpjekja e dështuar e një grushti individësh të nxitur për ta penguar këtë zhvillim të bazuar në detyrimin përkatës ligjor të Këshillit Bashkiak, tregoi qartë faktin e thjeshtë se shumica e madhe e himarjotëve nuk i përkasin llogores së konfliktit, përçarjes dhe amplifikimit absurd të një sherri primitiv, i cili ushqehet për interesa dhe hesape që s’kanë asnjë lidhje me interesat dhe nevojat legjitime të popullit të Himarës”- shkruan Rama.

Ndërkohë, Vangjel Tavo prefekt i qarkut të Vlorës që ishte në Himarë këtë të premte dhe u bë protagonist i një sulmi nga disa mbështetës të Fredi Belerit u shpreh se kanë qenë disa interesa të ngushta që sipas tij e kanë marrë peng komunitetin himarjot.

Sakaq, Previn Gjikuria nënkryetari tjetër i bashkisë që u tërhoq nga gara deklaroi se e bëri këtë gjest për t’i hapur rrugë bashkëpunimit në të mirë të Himarës dhe përgatitjeve për sezonin turistik.

LEXONI GJITHASHTU: 

• Eksperti: 5000 euro për ushtarët që do sulmojnë Kosovën, ku po trajnohen serbët
• Gjikuria: Pse u tërhoqa në momentet e fundit nga votimi për drejtimin e Himarës