Zgjedhjet në Kosovë/ Bllokohet faqja e publikimit të rezultateve, reagon KQZ

Pas publikimit të të dhënava nga numërimi i 23% të kutive të votimit faqja zyrtare në internet e Komisionit Qendror të Zgjedhjeve në Kosovë ka rënë.

Faqja e KQZ ka shfaqur probleme duke mos shfaqur të dhënat që kërkohen ndërkohë që në orën 21:30 është bllokuar fare azhornimi i rezultateve ndërkohë që shfaqet një tabelë “Server Error”.

Komisioni Qendror i Zgjedhjeve e pranoi se faqja po përballet me probleme teknike në platformën ku publikohen rezultatet preliminare të zgjedhjeve parlamentare.

Në një përgjigje për mediat KQZ-ja ka thënë se për shkak të interesimit të madh, faqja ka pasur mbingarkesë në sistem.

“Ju njoftoj se KQZ është duke mbledhur të dhënat pas numërimit të fletëvotimeve nga vendvotimet. Janë evidente probleme teknike në platformë. Të dhënat janë duke u mbledhur nga terreni dhe më pas do të publikohen nga KQZ. Për shkak të interesimit të madh të qytetarëve për t’u qasur në platformën e rezultateve, është shkaktuar mbingarkesë në sistem”, thuhet në njoftimin e zëdhënësit të KQZ-së, Valmir Elezi.

Ai ka shtuar se ekipet po punojnë në terren dhe po dërgojnë të dhëna “të cilat po bëjmë përpjekje që t’i transmetojmë në kohë sa më të shpejtë”.

Deri në momentin e rënies së faqes së KQZ-së, shifrat tregonin se janë numëruar mbi 23 për qind e votave e se prej tyre mbi 50 për qind janë për Vetëvendosjen. Megjithatë ka pasur raportime se të dhënat janë të gabuara.

LEXONI GJITHASHTU:

• Numërohen 23% të kutive të votimit, Lëvizja Vetëvendosje rritet ndjeshëm, bie LDK
• Numërimi i votave, Lëvizja Vetëvendosje iu kërkon vigjilencë vëzhguesve