Votuesit në Kroaci do t’u drejtohen qendrave të votimit të dielën për të zgjedhur mes 300 kandidatëve 12 përfaqësuesit në Parlamentin Evropian. Por, edhe pse me kërkesa modeste, disa votues nuk janë të sigurt se BE mund t’i përmbushë ato.

 “Dua të di se kush mund t’i bëjë çmimet e dyqaneve njësoj siç janë në Evropë”.

 “Politikat evropiane po ndikojnë në jetët tona gjithnjë e më shumë, ndaj duhet të votojmë për dikë që mund të bëjë ndryshimin”.

 “Aktualisht vendimet po merren me dyer të mbyllura dhe ne nuk e dimë se sa e madhe do të jetë influenca e Parlamentit mbi Komisionin. Është kjo që ndikon në jetët tona”.

Por arsyet përse qytetarët po u drejtohen qendrave të votimit nuk janë vetëm këto.

 “Ata që votojnë në zgjedhjet e BE-së e bëjnë këtë sepse është një urdhër partie që mund të vijë nga partia në pushtet, ose sepse njerëzit e kuptojnë rolin e vërtetë të Parlamentit Evropian dhe duan që zëri i tyre të dëgjohet”,-tha Darijo Čerepinko, analist politik.

Në zgjedhjet e 2019-s, Kroacia doli me një përqindje fare të ulët votuesish, 29 për qind. Dhe shifra pritet të jetë e ulët edhe këtë të diel.

 “Parashikimet e rezultateve të zgjedhjeve të së dielës në Kroaci tregojnë se shifrat do të jenë po aq të ulëta sa 5 vjet më parë”,-tha Dušan Hadži Nikolić, Euronews.

Unioni Demokratik Kroat i qendrës së djathtë formoi qeverinë me partinë Lëvizja për Atdheun e krahut të djathtë në maj. Si shumë vende në Evropë, edhe Kroacia po anon djathtas. Por analistët thonë se partitë e këtij krahu nuk do të hyjnë në PE.

 “Me siguri në zgjedhjet evropiane Kroacia nuk do të shkojë djathtas. Nga e djathta vetëm një, ose dy kandidatë do fitojnë mandate. Ndaj mendoj se Kroacia do të ruajë rolin e qendrës” Darijo Čerepinko, analist politik.

Votimi në Kroaci do të nisë të dielën në 7 të mëngjesit dhe qendrat e votimit do të mbyllen më vonë gjatë pasdites. Rezultatet paraprake, bazuar në sondazhe, do të dalin rreth orës 19:00.

LEXONI GJITHASHTU:

• Zgjedhjet në PE, holandazët të parët që u drejtohen kutive të votimit
• Zgjedhjet në PE, Çika: Dominojnë të djathtët, shtete e rrezikuara nga ekstremizmi