Zgjedhjet në Serbi: 21.3 për qind e qytetarëve votuan deri në orën 12:00

Serbia po mban të dielën zgjedhjet e jashtëzakonshme parlamentare, lokale e krahinore.

Të drejtë vote kanë rreth 6.5 milionë banorë, të cilët mund ta shfrytëzojnë të drejtën e tyre prej orës 07:00 deri në 20:00.

Deri në orën 12:00 kanë votuar 21.3 për qind e qytetarëve.

Kryetari i Komisionit Zgjedhor të Serbisë, Vlladimir Dimitrijeviç, ka thënë në konferencën e parë për media se të gjitha qendrat e votimit janë hapur me kohë – gjithsej 8.273.

“Materiali zgjedhor është i kompletuar dhe i saktë, dhe të gjitha qendrat e votimit janë hapur në orën 07:00”, ka thënë ai.

Këto janë zgjedhjet e pesta që organizohen në Serbi prej vitit 2012, dhe mbahen vetëm 18 muaj pas organizimit të procesit të fundit zgjedhor.

Zgjedhjet e së dielës do të monitorohen nga 5.587 vëzhgues vendas dhe të huaj – numër rekord i vëzhguesve, në krahasim me zgjedhjet e mbajtura deri më tani.

Zgjedhjet janë nxitur prej zemërimit në rritje të publikut për të shtënat masive të këtij viti dhe kërkesës së vazhdueshme të opozitës për proces të ri zgjedhor.

Dy sulmet me të shtëna masive të majit maj, që kanë lënë të vdekur 18 persona, përfshirë nëntë nxënës dhe adoleshentë, kanë rezultuar me protesta në rrugë me javë të tëra.

LEXONI GJITHASHTU:

• Serbia mban sot zgjedhjet e jashtëzakonshme parlamentare, lokale e krahinore
• Prag zgjedhjesh, Serbia voton të dielën, sondazhet: Partia e Vuçiç, 40% të votave